शरीरको एकातर्फ पोल्ने र फोका आउने समस्या: हर्पिस जोस्टर (शिङ्गल्स) बारे भ्रम र यथार्थ

शरीरको एकातर्फ अचानक पोल्ने, चसक्क दुख्ने र केही दिनपछि पानी भरिएका फोका देखिने समस्या आएपछि धेरै मानिसहरू यसलाई किराले टोकेको, माकुरोले डसेको वा माकुरोले पिसाब फेरेको कारण भएको ठान्छन् । हाम्रो समाजमा हर्पिस जोस्टर (शिङ्गल्स) सम्बन्धी यस्ता धेरै भ्रमहरू प्रचलित छन् । यही गलत बुझाइका कारण कतिपय बिरामी समयमै अस्पताल पुग्न नसकी घरेलु उपचारमा अल्झिन्छन् र रोग जटिल बन्न सक्छ ।

हर्पिस जोस्टर के हो?

शिङ्गल्स पनि भनिने हर्पिस जोस्टर भेरिसेला–जोस्टर भाइरसका कारण हुने रोग हो । यही भाइरसले बाल्यकालमा ठेउला (चिकेनपक्स) गराउँछ । ठेउला निको भएपछि पनि भाइरस शरीरबाट पूर्ण रूपमा हट्दैन; यो स्नायुहरूको जरामा निष्क्रिय अवस्थामा लुकेर बस्छ । वर्षौँ वा दशकौँपछि शरीरको प्रतिरक्षा शक्ति कमजोर हुँदा यही भाइरस पुनः सक्रिय भई हर्पिस जोस्टरका रूपमा देखा पर्छ ।